Surf, ondas, pesca, paseos polo monte cos cans… Todo no tempo libre de Adrián Felipez mira cara á natureza, cara á contorna máis inmediata, igual que a súa cociña. Por outra banda, a súa bagaxe culinaria paseoulle por algunhas das mellores cociñas de España e do mundo (Bo.Tic, Punto MX, O Celler de Can Roca) antes de que finalmente recalase na Coruña con MIGA, un proxecto persoal de cociña galega contemporánea, baseada estritamente na temporalidade e no mercado, ancorada ao terreo e ao momento.